Exodus 4
Izibonakaliso zikaMosi
1UMosi waphendula wathi, “Pho bangayekela ukungikholwa loba ukulalela engikutshoyo bathi, ‘UJehova kazange abonakale kuwe’? 2UJehova wathi kuye, “Kuyini lokho okusesandleni sakho?” Waphendula wathi, “Yinduku.” 3UJehova wathi, “Iphosele phansi emhlabathini.” UMosi wayiphosa phansi yasiphenduka yaba yinyoka, wayibalekela. 4UJehova wasesithi kuye, “Yelula isandla sakho uyidobhe ngomsila.” UMosi welula isandla wayibamba inyoka yasiphenduka yaba yinduku esandleni sakhe. 5UJehova wathi, “Lokhu yikwenzela ukuthi bakholwe ukuthi uJehova, uNkulunkulu waboyise, uNkulunkulu ka-Abhrahama, uNkulunkulu ka-Isaka loNkulunkulu kaJakhobe ubonakele kuwe.” 6UJehova wabuye wathi, “Faka isandla sakho phakathi kwesigqoko sakho.” UMosi wasefaka isandla sakhe esigqokweni sakhe, kwathi lapho esesikhupha, sasesimhlophe njengongqoqwane sesilobulephero.” 7Wathi njalo, “Sibuyisele isandla sakho esigqokweni sakho.” UMosi wasifaka isandla sakhe esigqokweni, wathi esesikhupha sasesibuyele esimeni saso, sesifanana lejwabu lakhe.” 8UJehova wasesithi, “Uma bengayikukholwa loba bengananzi izibonakaliso zokuqala, mhlawumbe bazakholwa ezesibili. 9Kodwa nxa bengakholwa izibonakaliso lezi ezimbili loba bengakulaleli, uzathatha amanzi emfuleni uNayili uwathele emhlabathini owomileyo. Amanzi ozawathatha emfuleni azaphenduka abe ligazi emhlabathini owomileyo.” 10UMosi wasesithi kuJehova, “O Nkosi, ngivele angisisikhulumi kusukela, kuze kube lakhathesi ukhuluma lenceku yakho. Ngiyagagasa njalo ngilamalimi.” 11UJehova wathi kuye, “Ngubani owapha umuntu umlomo? Ngubani omenza abe yisacuthe loba abe yisimungulu? Ngubani omenza abone loba amenze abe yisiphofu? Akusimi uJehova na? 12Ngakho hamba, ngizakusiza ukuthi ukhulume njalo ngikufundise lokuthi uthini.” 13Kodwa uMosi wathi, “O Jehova, ngicela uthume omunye ukuthi ayekwenza lokhu.” 14UJehova wathukuthela ulaka lwakhe lwavutha kuMosi, wathi, “Umfowenu u-Aronike, ongumLevi? Ngiyazi ukuthi uyenelisa ukukhuluma kuhle. Uvele usendleleni ukuzahlangana lawe, njalo inhliziyo yakhe izathokoza ukukubona. 15Uzakhuluma laye ufake amazwi emlonyeni wakhe. Ngizaliphathisa lobabili ukuthi likhulume njalo ngizalifundisa ukuthi lenzeni. 16Yena uzakukhulumela ebantwini, njalo kuzakuba sengani nguye ongumlomo wakho njalo kube angani wena unguNkulunkulu kuye. 17Kodwa phatha induku le esandleni sakho ukuze wenze izimangaliso ngayo.”UMosi ubuyela eGibhithe
18UMosi wasebuyela kuyisezala uJethro wathi kuye, “Bengicela ukubuyela ebantwini bakithi eGibhithe ukuthi ngiyebona kumbe balokhu besaphilile.” UJethro wathi kuye, “Hamba kuhle.” 19UJehova wayethe kuMosi eMidiyani, “Buyela eGibhithe, ngoba bonke abantu ababefuna ukukubulala sebafa.” 20Ngakho uMosi wathatha umkakhe kanye lamadodana akhe, wabakhweza kubabhemi waqala uhambo lokubuyela eGibhithe. Wathatha induku kaNkulunkulu wayiphatha ngesandla. 21UJehova wathi kuMosi, “Ekubuyeleni kwakho eGibhithe, bona ukuthi uyazenza zonke izimanga engikuphe amandla okuba uzenze phambi kukaFaro. Kodwa ngizakwenza inhliziyo yakhe ibe lukhuni ukuba angabavumeli abantu ukuthi basuke. 22Uzakuthi kuFaro, ‘UJehova uthi u-Israyeli yindodana yami elizibulo, 23njalo ngakutshela ngathi, “Vumela indodana yami ihambe, ukuze iyengikhonza.” Kodwa wena wala ukuyivumela ukuba ihambe; ngakho ngizabulala indodana yakho elizibulo.’ ” 24Kwathi besesendleleni, endlini yezihambi, uJehova wahlangana laye uMosi wafuna ukumbulala. 25Kodwa uZiphora wathatha ingqamu wasika isikhumba esisekucineni komphambili wendodana wasethinta izinyawo zikaMosi ngaso. Wathi, “Impela wena ungumyeni wegazi.” 26Ngakho iNkosi yasimyekela. (Ngalesosikhathi uZiphora wathi “umyeni wegazi” esitsho ngoba kube lokusoka.) 27UJehova wathi ku-Aroni, “Hamba uye enkangala uhlangabezane loMosi.” Ngakho wasuka wayahlangana loMosi entabeni kaJehova wamanga. 28UMosi wamtshela u-Aroni konke uJehova ayemthume ukuthi akutsho, njalo langazo zonke izibonakaliso ezimangalisayo ayemlaye ukuba azenze. 29UMosi lo-Aroni bahamba bafika baqoqa bonke abadala bako-Israyeli, 30u-Aroni wasebatshela konke uJehova ayekutshele uMosi. Wenza lezibonakaliso phambi kwabantu, 31bakholwa. Kwathi besizwa ukuthi uJehova uyabakhathalela, njalo wayelubonile usizi lwabo, bakhothama phansi bamkhonza.
Copyright information for
NdeIBE